Mga Aquino Appointees Pinagsusumite na ng Courtesy Resignation

Binigyan ng 7 araw ng Pangulong Rodrigo Duterte ang mga presidential appointee ng nakalipas na Aquino administration para magsumite ng kanilang courtesy resignation.

Sa memorandum circular na pirmado ni Executive Secretary Salvador Medialdea, exempted sa direktiba ng Pangulo ang mga bagong talagang cabinet secretaries, undersecretaries at assistant secretaries sa kani-kanilang departamento kabilang ang presidential advisers and assistants, iba pang opisyal sa executive department kabilang ang state universities and colleges at government owned and controlled corporations (GOCCs) na itinalaga ng kasalukuyang Pangulo.

Bukod pa ito sa career officials na tinutukoy sa civil service laws, rules at regulations, miyembro ng judiciary, mga opisyal na ang tanggapan ay binuo sa ilalim ng konstitusyon tulad ng Constitutional Commissions at Ombudsman gayundin ang mga appointments na pinoproseso pa o mga itinalaga ng Pangulo matapos ang effectivity ng nasabing memorandum circular.

Nakasaad din sa memo na hiwalay na tututukan ng administrasyon ang mga presidential appointee sa Armed Forces of the Philippines (AFP) at Philippine National Police (PNP).

Tanging ang Pangulong Duterte o si Medialdea sa pamamagitan ng kapangyarihan ng Pangulo ang uubrang umakto sa courtesy resignations subalit maaari nilang ikunsider ang rekomendasyon ng appointee ng tanggapan o agency head.

Driver Lover ni De lima Pinanawagan ni Sandra Cam na Sumuko na

Nanawagan ang kilalang whistle-blower na si Sandra Cam sa di umanoy driver lover ni senator Leila De Lima na si Ronnie Dayan na sumuko na sa mga awtoridad.

Sa panayam ng Brigada News FM National kay Cam, sinabi nito na hindi makakapagtago si Dayan ng pang habang-buhay kung kayat mas maganda kung lulutang nalang ito para malinis ang kanyang pangalan.

Ayon kay Cam, mas makakabuti kay Dayan na tulungan ang gobyerno at ilahad ang kanyang nalalaman hinggil sa naging partisipasyon ng De Lima sa illegal drug trade sa New Bilibid Prison (NBP).

Kinakailangan rin aniya na ipaliwanag ni Dayan kung saan siya kumuha ng malaking halaga ng pera upang makapatayo ng dalawang malalaking bahay.

Bar-owners Pupulungin ng PNP laban Illegal Drugs

Nakatakdang pulungin ni Philippine National Police (PNP) Chief Ronald "Bato" Dela Rosa ang mga may-ari ng clubs at bars sa MNetro Manila bilang bahagi ng kanilang kampaniya kontra iligal na droga.

Ayon kay Southern Police District (SPD) chief Superintendent Tomas Apolinario, ilalatag ng PNP ang mga polisiya at direktiba sa mga club owners kung paano nila maiiwasan ang pagkalat ng iligal na droga sa kani-kanilang mga establishments.

Dagdag pa ni Apolinario, nakipagkoordina na ang SPD sa mga local government units para magpatupad ng mas mahigpit na ordinansa sa mga clubs at bars.

Tatanggalin aniya ang business permit ng mga bars na hindi susunod sa mga polisiyang ilalatag sa meeting sa Miyerkules.

Inaasahang dadaluhan ang meeting nina National Capital Region Police Office (NCRPO) Chief Superintendent Oscar Albayalde, mga kinatawan ng Philippine Drug Enforcement Agency (PDEA), mga LGUs ng Makati at Taguig na gaganapin sa isang club sa Bonifacio global City Taguig.